1. Am 19. Januar am 9 i hämmer Winterthur verloh,
und sind am 10 i scho im Buriet acho.
Noch dä Begrüessig und em Znünihalt,
simmer denn wyter über d`Grenzä in Bregenzerwald.
Am 12 i simmer scho bim Hotel Chronä vorgfahrä,
und händ euseri 7 Sachä abgladä.
Mir händ denn no d`Pischte inspoziert,
und vorher no bimä Biathlon gspioniert.
Am 4 i hämmer eus i der Isbahn hindä troffä,
und sind denn wieder gmütlich i`d` Chronä fürä gloffä.
Am 1/2 7 i hämmer es guets Nachtessä übrecho,
und im Restorant hämmer no en Schlummertrunk gnoh.

2. Am Sunntigmorgä am 10 i hämmers Hotel verloh,
und sind grad uf d`Pistä cho.
Es ist wunderbar gsouhret gsi,
und au Wachsä ist ä keis Problem gsi.
Hüt laufemer Richtung Wahrt,
denn s`Edelwiss macht eus dä Zmittag parad.
Am 12 i sind scho alli itroffä.
am 1/2 2 simmer wieder zruck is Dorf,
do hämmer im Hotel no d`Badelandschaft durchforscht.
Am 3 sind diä Winterthurer scho all verchrochä,
ich glaub diä sind bi dem schönä Schnee zviel gloffä.

3. Mäntigmorgä 0°, + 2 cm. Neuschnee und Piste guet,
mir gönd wieder uf de Langlauf mit frischem Muet.
Zerst tüemer no Schii präpariere,
ä chli blauä Stöckliwachs tüemer druf-schmierä.
Bis is Brüggli ab bin ich, und denn links abbogä,
do han ich no en churzä Halt ytogä.
Do chunt denn es jungs Fräulein im Schuss,
und macht fast vor mich herä en Sturz.
Sie ist aber gli wieder uf d`Bei cho,
denn hät sie mich bös aaglueget und lauft derfoo.
Am 12 i; treffet mir eus zum Mittagshalt,
noch a der Pistä, i der Gräsalp.
Am Nomittag wird no ä chli gloffä,
bevor denn alli gegä s` Hotel zuä trotten.
Do häts sonigi, diä gönd go schwimmä,
und die anderä gönd go liegä-
Noch em Nachtessä häts no ä lustigi Spielrundi gää,
und de Schlummertrunk häts au no gää.

4. Zistig - Morgä, -- 0° Grad und witeri 2 cm. Neuschnee,
aber d`Sunnä chammer dä ganz Morgä niä gseh.
Es ist grau, Scneefall und ä schlechti Sicht,
euses Programm lutet, am 12 i im Hotel Schiff.
Es hät viel Läufer trotz derä schlechtä Sicht,
und öpädiä küsst einä oder eine dä Schnee mit em Gsicht.
Vo euserä Gruppä han ich niemer gseh,
drum bin ich denn zuä glaufä bi starchem Neuschnee.
Sternmarsch förmig simmer denn ytroffä,
und grad as Hotel Schiff anägloffe.
Am frühnä Nomittag sind scho alli wieder i dä Chronä,
und tüend sich für dä Theateronig Schoonä.

5. Mittwoch -5°, - blauä Himmel und Sunnäschi,
drum gömmer bi Zytä a d`Schii.
Im Tannahof gäbs hüt dä Mittagshalt,
gegä Damüls hinderä isches abe iisig -Chalt.
Do chunt mir denn en 100-Kilo Mocke ganz usicher engegä,
er vertwütscht mi no mit emö Schupf und ist im Schnee glegä.
Er hät sich entschuldigt und ich han em ghulfä ufstoh,
denn hämmer beid dä Tatort verloh.
S`mittagessä im Tannahof ist guet gsi,
drum simmer am 2 scho wieder uf dä Schii gsii.
In chlinä Grüppli simmer denn zruck is Hotel, Chronä,
und do ist denn es Bad oder ä Duschi au nüd ohni.
Am 8 i simmer no 6 Personä uf Au i d`Uralp,
do gits en Folklore Abig mit Musig und Tanz.
Ae schöni Underhaltig hämmer do chönnä erfahrrä,
sind aber äm 10 i scho wieder im Hotel vorgfahrä.

6. Donnstig, -- en herrlichä Tag,
mir machet eus hüt uf die 1/2 11 parad,
S`Edelwiss hät leider hüt zuä, drum gömmer i d`Gräsalp,
zu euserem obligatorischä Mittagshalt.
Es ist hüt -10°, also recht chalt,
Dä Bregenzer-AAch no sind d`Bäum und Strücher voll vo Schneekristall.
Es git drum hüt wieder spitzige Finger,
d`Chälti chann wieder recht dur euseri Händschä dringä.
Euseri Damä sind hüüt wieder tüchtig uf dä Pistä,
obs d`Chälti oder dä Ehrgitz ist, hann ich no nüd chönnä uusäfindä.
Im Hotel simmer denn scho vor dä Vieäri,
aber vorher tüemer no s`Dorfkafi frekuentierä.
Noch em Nachtessä überchömet mir alli es Glas Wy,
und 5 von eus no es Gschenk für langjähriges im Hotel si.
Dä Junior-Chef hät no ä Dankesred,
und mir alli händ en gmüetlichö Obig erlebt.

7. Fritigmorgä, -3° bedekt und liächte Schneefall,
Im Hotel Post in Au gits denn dä Mittagshalt.
dä Schnee ist hüt ä chli stump, denn s`ist recht chalt.
aber mir sind pünklich am 12 i bim Mittagshalt.
Dä Emil und ich sind gmüetlich durs Dorf duraglaufä,
und gsehn do en Huufä neui Bautä.
D`Langläufer gönd denn über die obersti Pistä zruck,
und mir Fussgänger händ eus is Postauto vedruckt.
Mir sind denn noch dä 2 i scho im Hotel aacho,
do händ denn die meistä no d`Badlandschaft dragno.
Am spotä Nomittag bsuächet mir no d`Buurämarkt,
und chönd do no öpis postä für d`Heimfahrt.
So jetzt wott ich eui nümmä länger hihaltä,
und mini fuuhlä Sprüch ä chli mee für mich bhaltä.
Herzlichä Dank em Hansruedi für d`Organisation,
äm Hotel und em Personal für d`Bedienig und Pension.
Euch allnä bestä Dank für d`Disziplin und Gselligkeit,
blybet gsund und chömet alli guet hei.